ऊनको स्वीटर' अब युट्युबमा: हलमा तहल्का मच्चाएपछि डिजिटल प्लेटफर्ममा झुल्किए विपिन र मिरूना

काठमाडौं नेपाली सिने जगतमा सरल र अर्गानिक कथा पस्किएर दर्शकको मन जितेको चलचित्र 'ऊनको स्वीटर' अब सबैका लागि युट्युबमा उपलब्ध भएको छ। हलमा ५१ दिनभन्दा बढी सफल प्रदर्शन गर्दै करोडौँको व्यापार गर्न सफल यो फिल्मलाई निर्माण पक्षले बिहीबार आर्टमाण्डु (Artmandu) को आधिकारिक युट्युब च्यानलमार्फत सार्वजनिक गरेको हो।

गत वैशाखमा रिलिज भएको यस फिल्मले नेपालमा मात्र १२ करोड रुपैयाँ भन्दा बढीको सानदार कलेक्सन गरेको थियो। नेपालमा मात्र नभई भारतमा समेत ५१ दिन मनाउन सफल यस फिल्मको डिजिटल रिलिजलाई धेरैले निकै चासोका साथ पर्खिरहेका थिए।

दर्शककै मागका कारण युट्युबमा रिलिज

निर्देशक नवीन चौहानका अनुसार, फिल्म हलमा हेर्न छुटाएका हजारौँ दर्शकहरूको निरन्तरको आग्रहलाई सम्बोधन गर्दै यो निर्णय लिइएको हो। उनले भने:

"धेरै दर्शकहरूले विभिन्न कारणवश हलसम्म पुगेर फिल्म हेर्न नपाएको गुनासो गर्नुभयो। उहाँहरूप्रतिको जिम्मेवारी र मायालाई मध्यनजर गर्दै हामीले फिल्मलाई युट्युबमा ल्याएका हौँ।"

एउटा सुन्दर प्रेमकथा

पहाडी जनजीवन र सरल प्रेम सम्बन्धलाई बडो कलात्मक ढंगले प्रस्तुत गरिएको यस फिल्ममा विपिन कार्की र मिरूना मगरको केमेस्ट्रीलाई दर्शकले निकै रुचाएका छन्। फिल्ममा उनीहरूका साथमा सुनिल पोखरेल, माओत्से गुरूङ, विल्सन विक्रम राई, मेनुका प्रधान जस्ता दिग्गज कलाकारहरूको प्रभावशाली अभिनय रहेको छ।

यदि तपाईँ एउटा मन छुने र मौलिक नेपाली कथाको खोजीमा हुनुहुन्छ भने, 'ऊनको स्वीटर' अब तपाईँकै मोबाइल वा ल्यापटपको स्क्रिनमा उपलब्ध छ।